生命故事

喺信主之前，我份人比較冇安全感，好在意其他人對我嘅睇法，認為自己嘅價值係建基於父母、老師同朋友對我嘅肯定，所以我會好擔心做錯，例如：係學業成績上，認為默書拎100分先可以令到爹哋媽咪同老師開心；而係同朋友相處上，會經常講大話去應合人哋嘅喜好。所以喺每一段關係上都會感到好不安，因為我覺得如果我令人失望就會被人嫌棄。要滿足到人哋期望先係一個值得被愛嘅小朋友。

但係去到小五六嘅時候，我比班主任梁老師嘅愛所感動，係佢裏面，我見到佢所信靠個個上帝嘅個份愛同包容：人的確會犯錯，有時會令自己同人哋失望，但係上帝裏面有包容同體諒。而每一個人嘅價值都唔係由行為、成績，或者別人對我哋嘅肯定所建立。就算自己睇自己並唔完美，係上帝眼中我哋都係值得被愛，因為我哋本身就係有價值。

喺梁老師嘅影響底下，我對佢所信嘅上帝充滿好奇，由個日開始，我決定翻教會，希望認識呢一位充滿愛嘅上帝，亦都可以成為好似梁老師一個充滿上帝嘅愛嘅人，令我從心底裏得到平安，唔再介意人對我嘅睇法，唔再擔心因為自己做錯事而受到嫌棄，而係福音營入面，我都決志信主，希望耶穌基督成為我生命嘅主宰，將自己都交係佢手入面。

翻左教會之後，導師組員嘅關心同陪伴，抑或係信息分享同詩歌嘅敬拜裏面，都令我感受到上帝個一份無條件嘅愛。記得有一次，上帝藉着一位組員為我祈禱嘅時候同我講：申命記 31:8「耶和華必在你前面行、他必與你同在、必不撇下你、也不丟棄你、不要懼怕、也不要驚惶。」喺呢一句經文入面我深深感受到即使我犯錯，只要我真心悔改，求上帝原諒，佢都會原諒，並且應承我唔會dum低我，喺佢嘅裏面我可以有勇氣去面對所有不安。雖然我仲未可以完全放下或者唔在意其他人對我嘅睇法，但係我唔會再為咗迎合其他人而講大話，反而面對真實嘅自己，因為我知道上帝看我為至寶。我變得心裏有平安，亦知道我嘅價值唔係來自於他人對我嘅睇法同期望，我嘅安全感係來自於上帝永恆不變嘅愛，而唔係同人嘅關係。

係翻咗教會嘅呢十年入面都唔係一帆風順，會有同組員導師嗌交嘅時候，亦都會對教會或者聖經嘅教導有疑惑嘅時候。我嘗試過參加其他教會嘅聚會嚟逃避問題，但當遇到人際關係同對教會政策有唔同意嘅時候，我先意識到其實問題嘅根源係我對上帝嘅順服同謙卑。因為神嘅愛，佢每一次都會修補我內心嘅傷口，令我有力量同勇氣去繼續面對困難，亦都讓我重新去檢視同上帝嘅關係，放低自己嘅硬頸，誠實面對自己同上帝。同時，我亦都希望能夠成為其他人嘅祝福，將我感受到嘅個一份愛都送比身邊嘅人，亦都運用我嘅神所賜比我嘅才幹去服侍。係服侍嘅過程中，我更加體會到上帝先係我唯一嘅依靠同安全感嘅源頭，我唔再依賴於人哋對我嘅評價嚟評估自己嘅價值。我知道呢一切嘅改變都係上帝嘅工作，係佢用佢嘅愛嚟填補我內心嘅需要。當我意識到我自己嘅問題，我決定公開宣認上帝係我生命中嘅王，讓神嚟改變我嘅生命，並以粉嶺堂為我屬靈嘅家。