生命故事

大家好，我係逆光區Uneon 嘅Wingo，好開心今日可以藉住浸禮同大家分享我嘅得救見證。

係信主之前一係一個好無安全感同好自卑嘅人，都因著嗰份自卑，我都變成了一個好難同人相處嘅人，所以由細到大都會被標籤為人際差嘅人。就係因為成日畀人話人際差，所以我會好努力咁同身邊啲人去做朋友。當朋友叫我幫到手嘅時候，我一定唔會拒絕，因為我害怕因為唔幫手失去呢個朋友。都因為覺得自己難相處，難識人而捉實每段關係。例如小學嘅時候，可能同學會問我借功課抄，我都會因著擔心無咗啲朋友而答應佢地，可能背後就係講緊我覺得自己唔夠好，所以無人同我做朋友。都會將安全感放咗係關係上面，所以好害怕失去一段關係。

咁我細個就係係五旬節靳茂生小學讀書啦，係小六嗰年嘅畢業營裡面呢，咁就有一位導師係畢業營嘅第二日就邀請我決志信主，咁當時我仲係一個小朋友，無諗太多嘢就決志信主。一開始都係返教會同朋友玩，但後期因為不同嘅原因我就無再返教會了，直至到中一到中二期間突然有一下想返返教會，就開始返返粉嶺堂。好記得係返返教會之後導師同我栽培，係第一課就係問到究竟邊個掌管緊我嘅生命，而都邀請我將我嘅生命主權交返畀上帝，讓上帝嚟掌權返我嘅生命。當時知道自己控制自己嘅生命會令所有嘢都好混亂，所以我決定將自己嘅生命交畀上帝，決志信主。

回望返之前嘅自己，會發現自己係上帝𥚃面都經歷咗好多好多嘅恩典，亦有不同的更新改變。信主後，雖然我無一下子變得自信，好有安全感，但卻有唔同嘅改變。正如啱啱所講嘅，我會將安全感放咗係一啲關係上，但現在，我清楚明白到，安全感並唔係係人身上揾返嚟，而係上帝。我明白到嗰種當我地將期望放咗係人身上嘅時候，我地可能會感到失望，感到唔安全。就好似其中一次嘅督導入面，當我同導師去分享，覺得自己好似成日都係唔同嘅關係入面去揾嗰份安全感，當我無安全感嘅時我會好努力咁捉住嗰段關係。但導師卻提醒我，其實上帝先係嗰個愛同安全感嘅泉源，我應該係係上帝裡面揾呢一樣嘢，而唔係係人身上。當我真正明白到呢樣嘢之後，我開始會放低一啲唔健康嘅關係，會將自己放前少少。同樣地，我都知道上帝好愛我，我之前會覺得我好破碎，唔值得被人愛，覺得自卑，但上帝卻愛呢一個不完美嘅我，佢亦看我為寶貝。好記得有一次嘅退修入面有一個同上帝好美好嘅回憶，係退修嘅嗰一排並沒有一啲好唔開心，好無力嘅事情。忽然，就諗到一個問題，我問上帝：「上帝呀，係你眼中我係一個可愛嘅孩子呀，懂事嘅孩子呀？定係破碎嘅孩子呀？」上帝好快就回應我，上帝話：「孩子呀，我點諗真係咁重要嗎？難道你唔知我愛你嗎？」係呢一個回應，我深深感受到上帝係愛我的，無論我係一個點嘅孩子，上帝都愛，而佢愛唔係因為我好完美，好乖，只係因為我係我

最後，我好想分享一句金句係約翰一書4:19：「我們愛，因為神先愛我們。」呢個就係點解我會努力去愛身邊嘅人嘅原因。

將一切榮耀頌讚歸與天上嘅父